تونيزيانا ويب أواردز : تعفيييييييطط

النسخة الثانية متع تونيزيانا ويب اواردز طلعت معفطة أكثر من النسخة الأولى و هذا باش نوضحو في برشة نقاط .
1- لجنة التحكيم
فسرولي بلاهي كريم بن عمر و إلا أمال السماوي شنوة محل إعرابهم في لجنة التحكيم ...شنوة دخلهم في الأنترنات و شنوة علاقتهم بالأنترنات الأول عامل شركة إسمها Alternative Production Communication Conseil و كان صحافي في الراديو و الثانية مديرة برامج قنات تلفزة تي في . هاذم جايبينهم باش يخطاروا أناهي أحسن مدونة و شكون أحسن فنان . معناها على سبيل المثال نجيب سليم رياحي و نسألو شكون خير بندير مان أو كلاي ببج تاو هذا كلام . حاجة ميفهموهاش و ماهيش دومانهم كيفاش باش يقيموها و باش يخطاروا شكون خير من شكون . و الكلام هذا ينطبق زادة على محمد علي السويسي .
من الإخر ما فما حتى حد مؤهل في لجنة التحكيم باش يختار شكون أحسن فنان أو مصور أو أحسن واحد يحكي على السياسة أو أحسن نبار و حكايات اللايف ستايل و الرياضة و السفر .
2- Les catégories et les canditats
برشة خور فما في إختيار المترشحين و في التنضيم بصفة عامة 
2.1 - Les categories
زايدة حكاية النبار و الإمور حقهم عملوهم حكاية وحدة و هذا ينطبق زادة على حكاية التصاور و الإنستاقرام حقهم عملوهم كاتيقوري وحدة خاطر كيف كيف
2.2 - Les candidats
فما ياسر ضلم و حقرة في إختيار المترشحين .
في الكاتيقوري متع السياسة فما منافسة غير شريفة معناها كيفاش تحط هيثم المكي لي يخدم في الراديو و يسمعوه الملاين في منافسة مع ولاء القاسمي أو عزيز عمامي إلي نشاطهم مقتصر كان على الإنترنات و الشارع و متابعيهم لا يتجاوزوا بعض المئات .
و براس أمكم أمين مطيراوي شمدخلو في المجال هذا ... أمين مطراوي راس مالو كاميرا يصور باها المضاهرات و ساعة ساعة ياكل تراحة منعرش شمدخلو في السياسة و إلا على خاطرو يخدم مع أمال السماوي عضوة لجنة التحكيم في نفس المشروع الله أعلم .
في حكاية التصوير طارق مراد لأخر لحضة ريحتو مفماش مبعد فجأة نلقوه مرشح علاش يمكن خاطرو صحاب مع كريم بن عمر و كذلك الله أعلم .
في حكاية الفنانين منيش نشوف في حتى سبب يخلي بندير مان موجود مع المترشحين خاطر طيلة العام هذا مخدم شيء ما عدى غناية ولى زوز على حد علمي كان عمل ألبوم جديد و سمعو كان اللجنة التحكيم هذيكا حاجة أخرى .
في دومان المدونات فما خمسين ألف مدونة تستحق المشاركة في بلاصة مدونة بيغ تراب بوي إلي أخر مقال تكتب فاها عندو تسعة شهور و إلا مدونة les élucubrations de ziziridier إلي أقل ما نجم نقول علاها أنها على الحيط و مجت شيء و فما مدونات عملولهم سوميسيون يطيروا علاهى طيران.
بصفة عامة فما برشة مدونات و صفحات و حسابات  فايسبوك عملولهم سوميسيون و ما رشحوهمش تستحق على الأقل ترشيحها في المسابقة .
3- نضام التصويت
نضام التصويت يعتبر زباله و يخلي مجال لي إستعمال الميليشيات الفايسبوكية و لي بروفيل فيكتيف و إدخال لجنة التحكيم في التصويت النهائي بكل صراحة مضحك حيث يتم ضرب تصويت الجمهور عرض الحائط و لجنة التحكيم تحب تربح لي تحب عليه هي
4- تقييم عام للمسابقة
النجم نقلكم من توة إلي باش يربح مش معناها راهو أحسن واحد في دومانو لكن هو أكثر واحد عمل إشهار لروحو .
بصفة عامة نسخة عمناول أفضل نوعا ما من متع السنى في التنضيم و إختيار المترشحين و مكانش فاها برشة ضلم و خور .
الملاحضات :
1- العباد الذي تم ذكرها في المقال إلي هي : كريم بن عمر ، أمال السماوي ، محمد علي السويسي ، بيغ تراب بوي ، طارق مراد ، ولاء القاسمي ، عزيز عمامي ، هيثم المكي ، بندير مان و كلاي ببج ما عندي معاهم حتى مشكل و الكلام لي قلتو علاهم لا يزيدلهم لا يطيحلهم في قيمتهم .
2- تونيزيانا هي الوحيدة لي لاهية بالمدونين و ناشطي الإنترنات و هذا يتحسبلها بالرغم أنها كل ما تجي الطزها تعماها .
3- نقدي للمسابقة ما عندو حتى علاقة بترشيحي أو عدم ترشيحي للمسابقة

شعر بيدون

واعطي نصف عمري للذي

يجعل طفلا باكيا يضحك

واعطي نصفه الثاني لاحمي

زهرة خضراء ان تهلك

وامشي الف عام خلف كلمة

واقطع الف واد

شائك المسلك

وأركب كل بحر هائج

وحتى الم العطر

عند شواطئ الليلك

انا البشرية في حجم انسان

فهل ارتاح والدم الذي يسفك؟!

أخاطب الحياة فللحياة وهبت كل تدويناتي

هي كل..

ما املك