أريد أن أكون ... رابور !
تحب تولي تغني راب ، عندك موهبة لكن متعرفش كيفاش توضفها : تبعني بشوي بشوي تو نعتيك المراحل بالتفصيل بش تنجم تنجح في الدومان هاذا .
أول حاجة يلزمك تكون من عايلة بسيطة و خارج من حومة عربي هاذي قاعدة أساسية معروفة خاطر كي مبعد بش تولي تغني يلزمك في كل غناية تذكرهم بالحاجة هاذي و تقلهم خارج من الحومة و تربيت في الفقر إلخ إلخ ...
ثاني حاجة و هاذي أهم نقطة يلزمكم تركزو معاها يلزم تكون منفصم الشخصية ! إي نعم منيش نفدلك نحكي بالرسمي و هاو جايكم مثال :
مثلا في غناية يلزمك تسب الأغنياء و تردها فلوسو لكل حرام و مش بالضرورة تكون تعرفوا العبد لي تسب فيه و لا تثبتلوا في فلوسو حلال وإلا حرام و مبعد يلزمك تخرج غناية أخرى تقول فاها راني غني و دايرين بيا برشة بنات و إنجم نشري كل شيء . أوكي ... فهمتوها النقطة هاذي ... نتعدوا
ثالث حاجة مش لازم تكون باهي بالفرنسي و إلا بالإنقليزية بش تعمل des metaphores و punchlines باهين يكفيك تكون تعرف ثلاثة و إلا أربعة كلمات بالأنقليزية كيما nigger و mother fucker و bitches ومش بالضرورة تكون تعرف شنوة معناها الكلمات هاذوما .
رابع حاجة يلزمك ديما في غناياتك تقول لي عندك برشة أعداء من البلايص لكل و الناس الكل تكرهك و في نفس الوقت الناس لكل تحبك وعندك برشة فانات .
خامس حاجة يلزمك في غنايتك لكل تسب الحاكم ضربك مضربكش مش بالضرورة يكون عندك معاه مشكلة بش تسبو خوذوها قاعدة هاذي يلزمك تسب الناس الكل و متفلت حد و مبعد كي يجي يوقفك الحاكم يلزمك تبكي و تتسكبن و تبدى تتشعت فيه بش يسيبك ... شبيك الرابور ما يخافش من الحاكم .
سادس حاجة لي هي عندي القاعدة الذهبية يلزمك أنواع الموبيقات لكل تبدى مجربها و يلزمك تستهلكها بإنتضام مكانش تكذب على روحك مكش رابور من الزطلة للأرطال ما تراتي شيء صحيح ماهوش بش يزيدلك شيء في كاريارك أما جوست بش تلقى متحكي في معضم الغنايات لي بش تهبطهم من نوع كل يوم نتكيف خرم و إلا كل يوم بلعة مع الأصحاب . و ملاحضة صغيرة حتى عمرك مجربت في حياتك الموبيقات هاذم تنجم تقول في غناياتك لي إنتي كل يوم بالعو وكل يوم متكيف زطلة نورمال مفما حتى مشكل شكون بش يحلب .
و حاجة مهمة ياسر يلزم نحكوا فاها هي الإسم المستعار لي بش تستعملو و تولي لعباد لكل تناديك بيه يلزم في أغلب الأحيان يكون MC ومعاها إسمك مثلا MC hamza و إلا MC bilel و مش بالضرورة تعرفها MC شنوة معناها و إلا شنوة يقصدوا باها وكان إسمك مزمر متركبش معاه MC تنجم تشوف إسم رابور معروف و حل تقلدلو إسمو .
في الحوصلة بش تكون رابور في تونس يلزمك تكون منافق و كذاب و ساعة ساعة متكبر و صاحب نفوذ و العباد لكل تكرهك و في بعض الأحيان زوالي و الناس لكل تحبك و ديما ضالمينك .
إن شاء الله تكون إستنفعتو من المقال هاذا و عجبكم ياسر و نرجعولكم الأسبوع القادم بمشروع أو مهنة جديدة تحبوا تنتلقوا فاها و نصاءح جدد و توة نقولوكم إلى القاء