أول حاجة هي يلزكم الطول في اللحية و تنقص في شلاغمك و تشري قميص وهو متوفرة في جميع النصب أمام المساجد خاطر الهندام و الطلعة البهية مهمين برشة في المجال هذا .
ثاني حاجة وهي أيضا متعلقة بالمضهر هي العطر ... العطر عندوا أهمية كبرى كيفاش مالا تحب تولي سلفي منغير عطر ؟؟؟ مالا تعرف شنوة تعمل توة كيما العادة النصبة لي مقابلة أقرب مسجد لداركم و تصنع جوك العطر هاوينوا أنواع و أشكال و يلزم ريحت العطر تكون تفحفح على بعد زوز كيلوماااااتر (copyright bahri jlasi) .
ثالث حاجة هو المستوى التعليمي و الثقافي لي لازم يتمتع بيه الشاب السلفي ... مش مشكل كانك ما فتش السيزيام بلعكس لعباد ليكيفك مطلوبين ليوم يلزمك تكون 0% ثقافة 100% بهامة ومش مشكل زادة كان ماكش حافض حتى كلمة من القرآن و إلا متصليش عاد جدا وتنجم تتجاوزوا العاءق هاذا .
رابع حاجة يلزمك تكون متناقض في أفكارك والنقطة هاذي يتشارك فاها السلفي و النهضاوي .
مثلا يلزمك تعفس على علم أمريكا بسبادري أزيكس أو أديداس إذا إسطتعتم إله سبيل .
مثال أخر يلزمك تحب القرضاوي و تكره قطر خاطرها بنت أمريكا المدللة .
خامس حاجة هي يلزمك تكون مستعد للجهاد في سورية في أي وقت ديما الكفن متاعك يبدى محطوط على جنب في حالت ما عيطولك بش تجاهد تحطوا على ضهرك و تشد الربعي .
و زادة مش مشكل كان خليت والديك يتعذبوا و محروقين عليك خاطر مش تحت أقدام أمك الجنة بل تحد أقدام زعيم جبهة النصرة و جماعة أنصار الشريعة خاطهمر هوما يعرفوا مصلحتك أكثر من أمك .
حاجة أخرى يلزمك تكون ذو بنية جسدية باهية و متدرب على حمل السلاح ... مش زلاط توا ولا فاها كالاشنيكوف اللعبة معناها لازم تكون محضر روحك أما زادة مش مشكل إذا معندكش بنية جسدية باهية و إلا عندك إعاقة جسدية و إلا حتى مشلول جملة وحدة المهم تكون حاضر وين الكرتوش يخيط .
الحاصل لازمك تتمتع بالبهامة و التعنطيز و إلي يخالفك في الرأي متتردش بش تعطيه الصرفاق .
و إلى اللقاء و الجمعة الجاية كي العادة نحكيلكم على مجال جديد تنجموا تتميزوا فيه .
0 commentaires :
Enregistrer un commentaire