أريد أن أكون ... نهضاوي !

باز متوقعها حد هاذي هههههه أهوكا بش نعطيكم طريقة ساهلة و مبسطة كيفاش تولي نهضاوي على قاعدة من غير معلم.

أول حاجة إنتي علاش تحب تولي نهضاوي . فما برشة أسباب... مثلا كل مليونية تشبع شوكوطوم و فلوس و مصروف جيب و رحلات حصيلوا حالة معاك تولي هاذا الكل مقابل أنك تصوتلهم .

هاذايا كيفاش تكون نهضاوي شكلا توا بش نعطيكم الطريقة كيفاش تكون نهضاوي مضمونا.

اللحية من المستحسن تكون اللحية مسيبة بش كي تحب تتقلب و تولي سلفي متتعبش برشا (أهوكا نحب مصلحتكم و راحة المواطن) .

أول حاجة يلزمك تكون عامل تكوين صحة الراس و البهامة و هاذا متوفر في جميع مقرات حركة النهضة لهي منتشرة في كامل أنحاء البلاد .
شنوة معناها صحة الراس ؟ هي ساهلة برشا كي تبدا تحكي مع شخص و يقنعك إلي النهصة من أفسد ما فما تخرجلوا السلاح السري لي هو صحة الراس و البهامة و تقلوا يا كافر و يا مسوني و تحب الدخل البلاد في حيط و لكم حرية إستعمال ألفاض أخرة تعبر على نفس المضمون .

ثاني حاجة : الإنخراط ... الإنخراط لا بد منه ... تنجموا تعملوه كي تمشوا بش تعملو تكوين صحة الراس تضربوا حمامتين بحجرة تعملو تكوين في البهامة و إنخراط في نفس الوقت .

ثالث حاجة هو الإستعداد التام للسفر بش وين يعيطولك بش تطلع في الكار بش تحضر الإجتماع في آخر الدنيا لازم تكون في أتم الإستعداد مكانش يتخلو عليك خاطر كل كار متهز كان خمسين شخص على الأكثر معناها يلزمك تكون ديما حاضر بش ميفكلك حد بلاصتك .

رابع حاجة هو هزان القفة (الطحين) للعباد لي ترا فاهم إنتي أسيادك على خاطر هذوكم ناس مقدسين و يحرم إنتقادهم أو السخرية منهم خاطر هوما متع الإسلام و يخافو ربي و أحنى الكفار الوثنيين لي ميحبوش الخير لتونس .

حاجة أخرى يلزمك تكون خادم بدنك معناها يلزمك تكون عندك بنية جسدية باهية ... علاش ... برشة راهم طلعوا علاش : هو من أجل تبلبيز الإجتماعات و قتل الفرقاء السياسيين و تو نخصصلوا مقال وحدو الموضوع هاذا بعنوان أريد أن أكون عضو برابطات تبلبيز الإجتماعات و قتل المعارضين و المعروفة أيضا برابطات حماية الثورة لي هي جناح مسلح للنهضة .

برشة ناس بش يستغربوا لي آنا كيفاش نحب نشجع المواطن على الإنضمام للنهضة ... هو ببساطة أنا نحب راحة المواطن الذهنية و الجسدية تحب معادش حد يضربك في مضاهرة و ما يحاول حد أنو يغتالك : إنضم للنهضة .

و السلام .